Am 12. Hornig 1946 isch d Gugge 46 s erschti Mool gloffe.

S isch e Morgestraich-Idee gsii von e paar glatte Stryzzi, wos nit glatt gfunde hänn, am Zyschtig nummen ussschliesslig in d Heeli, ans 33er-Fescht kenne z goo, will am Faasnachtzyschtig rain gaar nyt gloffen isch.

D Inschdrumänt hän si vo irgendere Gugge, wo im Rest. Holbeinstube residiert hett, ussglehnt. Mit Uusnahm vo dääne 2-3, wo-ne Inschrumänt als Hobby gspiilt hänn. So z.B. dr Niggi Hodel, wo perfäggt hett kenne Klarinette spiile, oder dr Cheese Burckhardt mit dr Trompeete.

In dr erschte Baiz, s syg im goldige Stärne in dr Aesche gsi, haige si dr Leni Kost bim Nachtässe troffen und ihn als Tambuurmajor engagiert oder iiberschnuurt …

Ai, zwai Stund speeter sig dr Leni denn, voll goschdymiert, mit em beriehmte Abtrittbääseli als Guggemajorstägge, dääre Bandi voorgstande.

Anno 1946 und ’47 hett sich dää Huffe no «Zyschdigs-Gugge» gnennt, anno 1948 denn s erschti Mool «Guggemuusig 46».

Beraits im ’48 hett d Gugge 46 en aigeni Blagedde (hyt = Blääch) am Revers drait; hitte macht daas jo jeedi Waage-Clique …

Die kompletteschti Sammlig an Blagedde, Unikääter, Speziaal- und vo
Miss-Gugge-Blääch isch im Bsitz vommene ehrwyrdige Gugge-Stryzzi.

S Projäggd «Digitalisierig vo allem» isch Ändi 2015 realisiert worde und
alli Prunggstygg sinn doo, uff dr Homepage, z bewundere und z bestuune.

Fiir’s 75. Jubileeum isch denn e Usstellig blaant und in Voorberaitig.